Si Natsu Dragneel: Ang Fire Dragon Slayer (Deskriptiv)

          

               Natsu Dragneel, isang pangalang di pamilyar at kakaiba sa pandinig ng karaniwang Pilipino. Ito'y natural lamang sapagkat hindi naman siya kapanig ng mga kurakot na pulitiko ng bansa o kabilang sa mga sikat na artistang tinitilian ng henerasyon ngayon. Sa katunayan, hindi naman siya tunay na tao dahil isa lamang siyang karakter sa palabas na kung tawagin ay "anime". Iginuhit, kinulayan at pinagalaw ng mga malikhaing isip at voila ! nabigyang katauhan ang isang binatilyong bayani ng isang kathang-isip na kahariang kung tawagin ay "Fiore". Hindi man siya totoong tao, marami naman siyang mga tagahangang nabihag sa kanyang karisma at ipinagmamalaki kong isa ako sa mga tagahangang iyon.  

               Si Natsu ay ang protagonista sa kinahuhumalingan kong anime ngayon na pinamagatang "Fairytail". Kulay rosas ang kanyang buhok at kulay itim naman ang kanyang mga mata na nagliliyab kapag nakikipagsagupaan siya sa kanyang mga kalaban. Katamtaman lamang ang laki at hulma ng kanyang katawan. Nagtataglay din siya ng kayumangging kompleksiyon. Lagi niyang suot sa palibot ng kanyang leeg ang puti at makaliskis niyang bandana na bigay sa kanya ng kanyang amang si Igneel . May marka rin siya ng kanilang samahan na matatagpuan sa kanyang kanang balikat.

               Isa si Natsu sa pinakamatapang at makapangyarihang salamangkero sa Fiore. Ang kanyang mahika ay ang paggamit ng apoy na natutunan niya sa kanyang amang si Igneel na isang dragon. Dahil sa kakaibang kalibre na taglay ng kanyang mahika, tinagurian siyang "Fire Dragon Slayer" ng nakararami. Siya ay mapusok at walang ingat kaya naman marami siyang nagigibang bagay , mga imprastraktura, at maging mga pagmumukha ng kanyang mga kaaway . Likas na sa kanya ang pakikipag-buno kahit sa kapwa miyembro ng kanilang samahan ngunit kahit may ganoon siyang personalidad, isa siyang tapat at maaasahang kaibigan. Lagi siyang nariyan upang ipagtanggol ang mga ito mula sa pang-aapi ng mga kalaban. Kapag naramdaman niyang malungkot at nawawalan na ng pag-asa ang mga kaibigan at mga mahal niya sa buhay, handa siyang gawin ang kahit na anong paraang maiisip para magising lamang ang mga diwa at mapangiti ang mga ito.

          Sa kabila ng mga kahanga-hangang katangian na ito ni Natsu, hindi maikakailang may kahinaan rin siya tulad ng mga totoong tao. Madali siyang malula at mabilis pa sa alas-siyete na sumasama ang kanyang pakiramdam kapag siya'y nakasakay sa anumang sasakyang umaandar. Si Happy, ang kanyang alagang pusang may pakpak at partner sa lahat ng kalokohan lamang ang tanging nasasakyan niya na hindi nagdudulot ng anumang linggatong sa kanyang katawan. Nakakatuwang isipin na kahit may napakalakas na kapangyarihan si Natsu, hindi man lamang niya magawang talunin ang sariling kahinaan.

              Piksyonal man o kathang-isip lamang si Natsu Dragneel, hindi pa rin ito naging hadlang sa akin upang pag interesan at hangaan nang husto ang karakter nito sa "Fairytail". Marami akong natutunan mula sa mga kalokohan niya at para sa akin, siya ang kabuuran ng isang kaibigang tunay na masasandalan sa hirap at sa ginhawa.